Misc.

نثريات السنة الجديدة

يسألني أحد الاشخاص لماذا كتبت كثيرا عن موضوع (قندرة) ذلك الصحفي ؟ فأقول له انظر الى أحوال المسلمين أولا .. والعرب ثانيا .. غزة مدمرة وعرضها ينتهك ليل نهار .. وهؤلاء (الاغبياء) يضربون (صور) بوش بالقنادر .. انه الجهاد بشكله الجديد

***

حسن نصرالله يدعو مصر لفتح الحدود .. يا أخي انت أقرب شوي وانت اصلا على الحدود دافع وانصر عزة .. ولا هذيل مو مسلمين ؟ ياسيدي العزيز .. اذا كان الكلام من فضة فالسكوت من ذهب

***

قرأت لكثير من المدونين عن جملتهم الموجهة لجريدة الدار بسبب بعض ماتنشره تلك المدونات (الحرة) … هناك خبر بالصفحة الاولى عن مدونة جديدة تسعى الى خلق فتنة فيما يبدو !! لاحظوا معاي مدونة جديدة !! هناك المئات من المدونات بل ربما آلاف المدونات الكويتية والدار تكتب خبر عن مدونة واحدة فقط لديها ميول طائفية او مذهبية او سياسية !! .. شنو ماعندهم أخبار ؟ أو يبون يطيرون حريات المدونين والمدونات ؟

***

قبل كم يوم الجمارك صادوا بطول خمر .. والله أعلم من هالبطول (الاعلامية) كم بطل دخل الكويت ؟ المهم … صايرة حرب بين (الخليفة) وبين رجال الجمارك .. هذ ينزل خبر وهذا ينزل خبر .. اذا انتو وحوش وأقوياء وخبراتكم تستفيد منها أمريكا ودول أوروبا .. ماتقولونلي ليش كل يوم صايدين شي جديد ؟ هذا يدل على أن التجار يهربون أكثر من ماتصيدون .. ياحظي

***

Happy New Year !

‫28 تعليقات

  1. ما اقول الا كل عام وانت بالف خير

    وانا اقرا منونتك اكثر من الجرايد

    حتى الجرايد ما قمت اقراها
    اسمع الاخبار من الربع ولا الي اقراه بالمدونات

  2. ان شاء الله كل عام وأنت وأهل الكويت كلهم بخير وعقبال ما تصير مدونتك رقم واحد مو بس بالكويت بل بالوطن العربي… انته بس قول ان شاء الله
    :)

  3. صح كلامك صواريخ حزب الله ممكن توصل اي منطقة .. ولكن حزب الله مايبي يفتح جبهة مع اسرائيل بحيث ان يكون اهو البادئ .. فهو ملتزم بقرار وقف اطلاق النار تبع مجلس الامن اللي صدر بعد حرب يوليو 2006 .. طبعا هالكلام مو من عندي .. هذا كلام السيد في خطاباته .. لذلك تشوفه رسمي وملتزم بالقوانين الدولية وغيرها ومقتصر وضعه على الدفاع علشان لا تكون حجة على اعداءه .. ومع ذلك ما يسلم من الحجي ..
    الحين غزة قاعد تقصف .. بيوم واحد 250 شخص قتل .. لو كان ساكت السيد جان ماسلم .. ولما تكلم وقال ياجماعة ساعدوا اخوانكم بغزة .. بطلولهم الحدود تحركوا سوووا شي .. المفروض نقوله جزاك الله خير .. عالاقل موقف بالكلمة .. أحسن مما نقوله السكوت من ذهب !

    1. مايبي يفتح جبهة ؟؟؟

      أتمنى محد يشوف كلامك !!!!
      أنا عاذرك يمكن كان ودك تقول أن علشان محرم فمايجوز الحرب ؟؟ هذي ممكن

      بس خل أقولك شي

      حسن مسلم
      والفلسطينيين مسلمين

      صح ؟؟

      أعتقد ان عيب مسلم عنده امكانيات ويشوف اخوه المسلم ويسكت علشان خايف على الجبهة اللي بيفتحها

      صح ؟؟

  4. السيد حسن قال ما لم يقوله القادة والكتاب قال كلمة حق لذا تحركت الشعوب في البلاد العربية و الإسلامية بتجاه السفارات المصرية .
    وهذا يكفي والحرب لم تنتهي لننتظر إلى نتائج المواجهة حسب وجهة نظر إسرائيل أنها ستزيل حماس من غزة لنرى أن لم يتمكنوا فهذا نصر ثاني ضد اسرائيل التي دخلت حرب لبنان للقضاء على حزب الله ولم يستطيعوا وهذه الثانية انشاء الله وهذا يعني أن المراحل القادمة ستكون هزيمة للشعب الإسرائيلي ومن ثم إلى الآلة العسكرية وإن الزبالة زائلة والعزة لغزة.
    ودمتم

  5. انا افترض انك متابع وعندك خلفية عن حرب لبنان 2006 و نزاعات الاطراف اللبنانية وقضية مطالبة البعض لنزع سلاح حزب الله والخلافات الداخلية على ذلك ..
    حزب الله عنده امكانيات ومو مستبعد ان يدش عالخط حسب كلام السيد من جم يوم .. ولكن هالامكانيات مخصصينها للدفاع عن ارضهم ..
    نفرض مثلا الحين حزب الله اطلق صواريخه على حيفا وتل ابيب فزعةً منه لغزة … شنو تتوقع بيصير ؟ اكيد بيقصفون بيروت ويحرقون لبنان .. والكل راح يلومه ويوقف ضده ويقوله انت دمرت لبنان !

    وبالنسبة لجملتك الأخيرة .. الأولى انك تشوف امكانيات مصر .. ما أقولك شوف امكانياتها العسكرية .. فقط شوف امكانياتها في فتح المعبر .. وسماحها بمرور المعونات والأكل والشرب .. واذا تغض البصر عن مرور الاسلحة بعد اهني نقول تعبت روحها وايد مصر p:

    أخيرا شوف المقارنة:
    بين موقف سيد حسن كـ زعيم حزب في دولة
    وبين موقف حسني مبارك كـ زعيم دولة

    1. هذا احنا للاسف ننجر وراء الشعارات والخطابات !!

      صدام حسين
      ياسر عرفات
      حسن نصرالله

      وبالاخير ما استفدنا شي

      من سيء الى اسوأ

  6. D:
    من ياب طاري الشعارات ؟

    كل الكلام اللي انطرح نقاط موضوعية .. وآخرتها تقوللي صدام وعرفات ونصرالله ؟!

    عموماً أحسن كلمة انت قلتها “اذا كان الكلام من فضة فالسكوت من ذهب”
    وهذي الكلمة اتمنى كل واحد فينا يطبقها على نفسه قبل لا يقول شي ماهو قدّه ويتوهق فيه ..

  7. فقع حسن زعلان

    يعني الحين يبي يحترم الاتفاقيات، عيل لما جر بيروت للدمار شنو نسميها و ليش عاند؟

    بعدين الصعادي يفرق عن الشراقي بالحرب، اثنينهم مالهم لزمة

  8. اكزومبي : لك شومالك يازلمه ؟ مين اللي فقع ؟!

    فرانكوم : اقرا الردود مرة ثانية وشوف انا شقلت وانت شرديت علي ..
    يا انك طوفت ردود من غير ماتدري ومو مركز بالموضوع
    أو انك تتعمد وقعد تطمطم وتبي تاخذها بالنرفزه وسبني واسبك ..

    انا اقول صف النيّة

    1. kuf3
      Thank you. but could you explain more?
      its very simple formula, Mr. Hassan Nasrullah is Muslim right either he is Suni or not and our brothers in Ghaza are suffering and he just came and said “Hey Egypt open your border for sake of help” ! come on ! your people has the most advanced missiles and rockets and his media is the best army media in the whole Arab world right?

      why he is not fighting them?

  9. إذا كان في شخص صادق في الموضوع والوضع اللي أحنا فيه في غزة جان ما صرح بس !
    جان في خير السيد فتح جبهته وقطلنا صاروخين.. تعتقد يسويها?
    ترى شكلها الإسرائيليين ضامنين الجبهة الشمالية وضامنين إن ما راح يسوون شي. شكلها عندهم تعهد إن مافي صاروخ راح يطلع من الحزب اللي أطلق المئات قبل فترة ما هو بعيدة.. يسويها اليوم ويغير الحسبة.. إذا كانوا صاجين؛ ألحين أحسن وقت. وصل الرسالة يا رجل.

  10. As a matter of fact he did , and still doing the best he can to elevate the Arab resistance conscious, Naser Allah give his son as a martyr in fighting Israel
    Fighting Israel & Palstine liberation is every human goal, but many of us get distracted and misled by the media and start “without knowing” looking to the facts as a TV show, and our actual opinion become what we like to see or not..with doing that we only help Israel while we “think & say” otherwise
    Thank you

    Egypt in fact open the border for medical aid, we all know that the political map is complicated & not pretty at all, I had no doubt that in Mr. NaserAllah heart&mind the Palstinian suffering, but most of the Arabic media like Aljazzera is distracting the viewers from the facts on the ground, picturing the Genocide as a war between equals, for the convenient of Israel & inflaming the blame game in the time of unity and a necessary act to fill a duty, there is so many ways for actual help

    and now im asking

    why people insult him ?
    what did he say wrong??

    1. Kuf3

      باختصار
      قلتها وراح اقولها مرة ثانية بشكل مبسط
      لو شعب غزة من الشيعة جان شفت ايران وحسن نصرالله صواريخهم واصلة اسرائيل قبل لا يفكرون اليهود بشي ثاني
      بس شنقول … الله كريم

      عاد افهم كلامي عدل واتمنى لايجرح احد لان هذا الصج

      ولا السيد مثل ماقلت مسلم صح ؟ بس انتو تقولون مايبي يفتح جبهة

      اللهم لاشماته

  11. حزب الله وايران وحماس وسوريا جميعهم اتفقوا على رأي واحد وهدف واحد وهو الذّود معا والدفاع عن بعضهم فيحالة العدوان…
    لماذا لا يفتح السيد ويؤيد الشريك في فلسطين؟

  12. ولا تقربوا الصلاة .. ؟
    انا قلت
    (( مايبي يفتح جبهة يكون اهو البادئ فيها ))
    و لو كان شعب غزة شيعة ولا سنة ماكو فرق
    كلنا شفنا بحرب 2006 حزب الله حارب و ايران الشيعية ما طيّرت صواريخها على اسرائيل !

    شوف بالأخبار .. شوف صواريخ حماس صناعة وين ؟ ومنو معطيهم اياها ؟ كله صناعة ايران وتهريب حزب الله

    عالأقل حزب الله قاعد يساعد من تحت لي تحت .. ومن فوق لي فوق قعد يتكتك حربياّ .. واعلامياّ مو مقصر أبداً

    اذا بتاخذها سنة شيعة .. تكفه شوف منو من حكومات السنة تزحزح من مكانه ؟؟ وشوف ايران الشيعية شنو موقفها … عالأقل شوف بس الموقف الاعلامي السياسي

    وبالأخير يساوى السيد بصدام ؟
    عيب والله عيب ..

    شوية انصاف يا جماعة

    1. كلام سليم
      بس على فكرة ايران قلت ماساعدت حزب الله
      ممكن توضيح ؟

      وممكن توضيح شلون اسلحة ايران راحت حماس ؟

      وممكن توضيح شلون مشت على اسرائيل هالحركة ؟

      وممكن توضيح شلون السيد غير صدام ؟

      شكرا

  13. قصدي بحرب لبنان 2006 .. ايران ما تدخلت بالحرب نصرة لحزب الله على بو انهم شيعة .. وهذا مثال كان ردا على قولك ان لو كان شعب غزة شيعة جان شفنا صواريخ ايران وحزب الله واصلين اسرائيل ..

    وبالنسبة للسؤال الثاني
    أسلحة ايران وصلت حماس عن طريق حزب الله اللي وصلت له عن طريق سوريا
    طبعا هذي المعلومات متداولة بالتلفزيون والجرايد ..

    اما شلون مشت على اسرائيل هالحركة .. بصراحة مادري .. ولكن عندك المدة من حرب 2006 الى الايام الماضية كانوا يمديهم يهربون بالصواريخ مثل ما شلون ربعنا اهني شغالين تهريب بالبطول p: .. و حماس و حزب الله فاهمين بسوالف التهريب لا تسألني شلون لأن مادري
    اللي قريت عنه ان يفككون الصواريخ ويهربونها ويردون يجمعونها مرة ثانية .. هذا غير اللي يصنعونه محلياً

    أما بالنسبة للفرق بين السيد وصدام .. هالسؤال أحوله عليك مع تغيير : شنو وجه الشبه بين السيد وصدام ؟؟؟
    صدام اعتدى على جيرانه المسلمين أما السيد دافع عن نفسه من جيرانه اليهود ..
    ممكن تقول ان السيد دمر بلده وحرق لبنان وبسببه ماتوا 1000 بالحرب ..
    اهني تعال تخيّل ان حزب الله ما رد على القصف الاسرائيلي وما طيّر صواريخه .. سكت .. علشان لا يقولون بسبّته تدمرت لبنان .. حزّتها بيقولون وين اسلحتك يا حزب الله !!؟؟ حق شنو خاشهم ؟؟؟

    1. ايران ماتدخلت بحرب لبنان ؟
      وانا اقولك نقلا عن الجرايد والتلفزيون اقولك ان ايران كان ممول رئيسي لحرب حزب الله في لبنان ومن سوريا بعد طال عمرك ومو بس تمويل ودعم بالسلاح وبالمال بعد حتى انهم خصصوا ملايين الدولارت
      تفكيك الاسلحة وتجميعها طريقة استخدمت منذ مئات السنين وماعتقد اسرائيل مشت عليها هالطريقة
      الحين نوصل حق اهم نقطة
      وجه الشبه بين صدام والسيد

      اسال اي لبناني وقوله السيد شنو كان يسوي بالحرب
      العمارات اللي فيها ناس كانت جماعته تحط عليها علامات والحزب يدمرها بالليل انتقاما منهم في اعتقاد من السيد ان هذيل خونة والعمارات فيها اطفال وحريم وشيوخ وبالصبح بالاخبار تطلع لنا الصور ان اسرائيل دمرتها
      وايد لبنانيين قالوا ان هالشي صار بكثير من المناطق الجنوبية بس الاعلام تستر عليها .. وبعدين عناصر الحزب كانت تاخذ من العمارات ملجا لها والطيران الاسرائيلي قال اكثر من مرة ان هالعمارات راح تدمر وانذر السكان من الخروج الا ان الاوامر من السيد كانت تخليهم بالبيوت

      دمر البيوت وشرد الناس وقتل المئات
      وتقولي شنو وجه الشبه ؟

  14. يا الطيب .. يالحبيب
    انت قاعد تناقض نفسك
    انت تقول لو كان اهل غزة شيعة جان صواريخ ايران وحزب الله وصلت اسرائيل .. قلتلك بحرب 2006 ماشفنا صواريخ ايران وصلت اسرائيل .. حزب الله مو شيعة ؟ ليش فزعوا لهم ؟
    تقول دعموهم بالمال والسلاح والسياسة ودعم معنوي وملايين الدولارات فهذا مافي اعتراض عليه ..
    وهذا نفسه الدعم اللي حصله حزب الله من ايران .. قعد تحصله حماس من حزب الله وايران وسوريا … وفوقهم بعد فلوس تبرعات من العرب وغيرهم ..

    حلوة منك من مئات السنين :)
    تفكيك الأسلحة هالكلام مو من عندي ..
    شوف الأخبار .. اخبار اليوم وامس .. شوف حماس وين قاعد توصل صواريخهم .. فوق الـ40 كيلومتر
    صواريخهم المحلية الصنع حدها 3 – 5 كيلو
    بالله من وين لهم صواريخ فجر3 وكاتيوشا و غراد ومادري شسمه؟

    أما للفقرة الثانية من كلامك بصراحة كلام مضحك وغير عقلاني .. ليش غير عقلاني ؟
    أولا على قولتك الخونة اللي بلبنان مناطقهم ما حاشها قصف .. المنطقة اللي انقصفت هي منطقة حزب الله جنوب بيروت
    ثانيا سالفة التعليم على مباني الخونة عشان يقصفونهم انتقاماً ؟؟؟ يعني قصدك حزب الله يحط علامات حق اسرائيل عشان يقصفون عمارة معينة مثلا ؟؟؟ الخونة شمقعدهم بجنوب بيروت مع اهاليهم اذا اهمه خونة ويدرون ان بيصير قصف ؟؟ و انتقاماً من شنو ؟؟
    منطقياً ما تدش المخ

    اللي سمعناه بالاخبار هو قصف مباني قيادات حزب الله ومساكنهم .. وبعد الحرب قالوا ان في خونة كانوا يعلمون عالمباني وبعدها تقصف المباني على طول ..

    البيوت المدمرة واضح ان اسرائيل اهي اللي قصفتهم .. والناس واضح ان اسرائيل اللي ذبحتهم ..

    للحين كلامك مو منطقي واخر شي تقول سامع من جم لبناني ؟
    شوف قنوات لبنان .. جرايد لبنان .. اللبنانيين اللي بالكويت .. اللي بالنت .. مافي احد منهم قال اللي انت قاعد تقوله

    تحياتي ،،

لاضافة تعليق