Misc.

الهدف من لوحات المرور الالكترونية

هذه الجسور انتشرت في كل شوارع الكويت الرئيسية قبل فترة وهي لوحات الكترونية كبيرة تعرض الساعة (التوقيت المحلي) بالاضافة الى السرعة المسموح بها في الشارع واضف الى ذلك الى رسالة عدم استخدام الهاتف .. والان تمت اضافة لوحات صغيرة أخرى أسفل اللوحة الكبيرة تضاء باللون الاخضر وتشير الى أن الحارات كلها (سالكة) وعند حدوث حادث لاقدر الله في أحد الحارات فإحدى هذه اللوحات الخضراء ستضيئ باللون الاحمر .. في الحقيقة أجد أن هذه اللوحات عكس مايقال عنها انها احد آخر مشاريع (التنفيع) للتجار ، فهي تتيح لنا معرفة الوقت لاننا وبكل بساطة لا نرتدي ساعات ولا نحمل هواتف نقالة بل أن سياراتنا لاتتوفر بها ساعات لان تكلفة السيارة مع ساعة يزيد من سعرها في السوق … اضف الى ذلك فان اللوحة الاخرى والتي تشير الى حدود السرعة في الشارع أيضا مهما لان الشارع بالاساس لا يحتوي على اشارات لوحية أخرى عل طول الطريق الممتد لكيلوات عديدة !! اما بالنسبة الى لوحة عدم أستخدام الهاتف النقال فهي رسالة أيضا مهمة … لان العديد لا يستخدمون الهواتف النقالة (أبدا) في السيارات

اما بخصوص الاشارات التي تظهر أثناء العواصف الرملية والمطر فهي ضرورية لان الانسان بشكل عام (لايفهم) أن خلال حدوث المطر لابد له من القيادة ببطء وأثناء العواصف الرملية لابد له من التوقف جانبا أو القيادة بحذر شديد لذلك فهي من الامور المهمة والحيوية

اما بخصوص العلامات الخضراء الجديد .. فقد التقطت هذه الصورة اثناء وجود حادث على أحد الطرق المعلق بها هذا الجسر … وكما ترون فان الاشارات الخضرات منارة كلها وكأنه لايوجد شيء يذكر !

أرأيتم كم هي جميلة هذه اللوحات الالكترونية .. وماهو الهدف منها

‫44 تعليقات

  1. هذي من البوقات العلنيه
    يا الداخليه دام انكم بايقين بايقين .. جان حطيتو الشاشه كبيره حيل مثل اوروبا وامريكا
    مو شاشه ٣ اسطر !
    ماتقدر تقرى شنو كاتبين !

  2. ما شاء الله عليك ..والله عبالي مقال منشور بجريده وانت ناقله :)؛

    ..
    بالنسبه لشاشات الاسهم اليديده ..هذي الشاشات مستحيل تشتغل الا مع غرفه تحكم ومراقبه حديثه تشمل كل شوارع الكويت ..ومااضن ان عندنا مثل هالغرف ..بس الحسنه الوحيده فيها انها تعطي شعور انك بدبي مو بالكويت :)؛

    …..
    اتمنى منهم ان يكبرون الخط بالشاشه الرئيسيه ويختصرون الرساله قدر الامكان …يعني مو معقوله حاطيلي (مقاله) من اربع اسطر وبأصغر خط عندهم ,بخط سريع حدود السرعه فيه 120 ويبون الناس يقرونها بعد !!؛

    مشكل

  3. مرات يكتبون الرؤية منعدمة انزين اذا الرؤية منعدمة هذا معناته محد يقدر يشوف اللوحة الالكترونية و يقرا اللي مكتوب

  4. “فهي تتيح لنا معرفة الوقت لاننا وبكل بساطة لا نرتدي ساعات ولا نحمل هواتف نقالة بل أن سياراتنا لاتتوفر بها ساعات لان تكلفة السيارة مع ساعة يزيد من سعرها”

    اي سيارة هذي الي مافيها ساعة ومنو بالكويت يطلع بسيارته ومايشيل معاه تلفونه النقال اذا مو تلفونين على الاقل بالسيارة

    تكفة ترا انت ماتعرف تطبل .. انصحك تبعد عن هالشغلة

    وانا مع الاخوان ٣ اسطر غير كافيه والخط جدا صغير

  5. الاخ اللي فوق ما فهم اسلوبك :)

    لكن بجد انا وايد امور الاحظها بالديره غلط مو بس المرور

    واللي يحر ان احنه دوله هالكبرها وفلوسنا وايد

    وحالنه بس استجوابات وناس تحبل لناس

    الله يغير علينا للاحسن ان شا الله

  6. أنا أشوف بحولون اللوحات الى ضريبة شارع الكترونية مثل ما هو معمول في دبي وعلى أن تكون الضريبة مرتفعة.. ووووو جان تنحل مشكلة الزحمة

      1. انا اتفق ان الشغلة تصير بفلوس، مثال يصير في كرت ذكي بالسيارة مثل ماهو موجود بكل المدن الكبيرة

        نيو يورك و سنغافورة وغيرها الكثير بس الي عندنا حرامية محد عرف لهم

      2. مااعرف اوضحلك قصدي

        بس انت شايف المناطق كلها على الخطوط السريعة يعني مو شارع داخلي بعدين دوار بعدين شارع

        خط سريع فرعي منه وحاطيلك اشارة

  7. il9ara7a cham mara “y7i6oon il6areeq amamik mozda7im..islik 6areeq a5ar” oo ya36eehoum il3afya at7asha ilza7ma..mo kil mara bs na36eehoum shwayat waqt 3ala ma yit3awidoon ysawoon update!

    1. كنت اصدقهم واغير دربي على طول وهم أتأخر عن الدوام ..
      بس يا اليوم اللي شفتها و مامداني اكسر عالحارة اليمين
      فكملت سيده .. ماكو زحمة !!
      بعد سيده .. الطريق سالك!!
      هم سيده .. وصلت دوامي ومبجر بعد!!

      من يومها ما قمت اصدقهم :)

  8. lol
    now you got what you want
    I know you know what I mean
    so please
    don’t ask me that silly question

    بس حلو الواحد يشاركم
    :)
    من اليوم تقولون شاشه وشاشه
    وبالاساس
    اهيه دايود
    نفس اشارات المرور وهالطقه
    مادري شلون اشرح لكم الدايود
    بس جان زين لو حاطين لنا شاشات صج
    بس
    :)
    عموما ماقصروا وكثر الله خيرهم

    Best regards

  9. لا ياجماعه الشاشه هذي وايد مفيده
    فيها وصله بليستيشن عشان تقزر عليك الزحمه
    بس لاتنسى تحطلك يده بالسياره

لاضافة تعليق